Azərbaycanın xarici işlər naziri Ceyhun Bayramov martın 14-də Bolqarıstanın xarici işlər naziri Georg Georgiyevin rəhbərlik etdiyi nümayəndə heyətini qəbul edib.
XİN-dən Adalet.az-a verilən məlumata görə, tərəflər arasında baş tutan təkbətək görüş daha sonra hər iki tərəfdən nümayəndə heyətlərinin iştirakı ilə geniş tərkibdə davam etdirilib.
Geniştərkibli görüşdə Azərbaycan-Bolqarıstan strateji tərəfdaşlığının müxtəlif, o cümlədən iqtisadi, ticarət, enerji təhlükəsizliyi, yaşıl enerji, humanitar, mədəni və s. aspektləri, gələcək planlar, habelə regional və beynəlxalq təhlükəsizlik məsələləri müzakirə olunub.
İki ölkə arasında mövcud strateji tərəfdaşlıq münasibətlərinin inkişafında mövcud siyasi dialoqun əhəmiyyəti vurğulanıb. İqtisadiyyat, ticarət sahələri üzrə əməkdaşlıq imkanlarının mövcudluğu vurğulanıb, Azərbaycan və Bolqarıstan arasında ticarət-iqtisadi və elmi-texniki əməkdaşlıq üzrə Müştərək Komissiyanın bu xüsusda rolu qeyd edilib.
Enerji sahəsi üzrə həyata keçirilən birgə təşəbbüslərin Avropanın enerji təhlükəsizliyinin təmin olunmasında vacib rol oynadığı diqqətə çatdırılıb, bu istiqamətdə əməkdaşlığın daha da genişləndirilməsinin, xüsusilə yaşıl enerji sahəsi üzrə yeni layihələrin icrası üçün geniş perspektivlərin mövcud olduğu bildirilib.
Ceyhun Bayramov həmçinin qarşı tərəfi postmünaqişə dövründə bölgədə mövcud vəziyyət və reallıqlar, işğaldan azad olunmuş ərazilərdə aparılan genişmiqyaslı bərpa və quruculuq işləri, mina təhdidi ilə mübarizə səyləri, habelə Azərbaycan-Ermənistan normallaşma prosesi barədə məlumatlandırıb.
Sülh müqaviləsinin mətninin razılaşdırılmasına baxmayaraq, Ermənistan tərəfinin konstitusiyası və digər qanunvericilik aktlarında Azərbaycana qarşı ərazi iddialarına son qoyulmasının, ATƏT-in keçmiş Minsk qrupunun və aidiyyəti strukturların rəsmi şəkildə ləğvinin ən vacib amil olduğu vurğulanıb.
Görüş zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb.
***
14:47
Azərbaycan xarici işlər naziri Ceyhun Bayramov və Bolqarıstanın xarici işlər naziri Georq Georqiev arasında geniş tərkibdə görüş keçirilib.
Adalet.az xəbər verir ki, bu barədə Azərbaycan Xarici İşlər Nazirliyi “X”də paylaşım edib.
Müzakirələr zamanı nazirlər Azərbaycan və Bolqarıstan arasında iqtisadiyyat, ticarət, enerji, nəqliyyat və kommunikasiyalar da daxil olmaqla bir sıra əsas istiqamətlər üzrə strateji tərəfdaşlığın gücləndirilməsinə diqqət yetiriblər.
Nazirlər həmçinin gələcək planları və iki ölkə arasında ikitərəfli və çoxtərəfli əməkdaşlığın daha da genişləndirilməsi üçün potensialı araşdırıblar.
Bundan əlavə, Ceyhun Bayramov bolqarıstanlı həmkarına münaqişədən sonrakı regional vəziyyət, son hadisələr və hələ də davam edən çağırışlar, xüsusilə Ermənistanın Azərbaycana qarşı konstitusiyasında təsbit olunmuş ərazi iddiaları barədə məlumat verib.
Xarici işlər naziri Ceyhun Bayramov da görüşlə bağlı paylaşım edib.
Nazir bildirib ki, görüşdə əsas diqqət enerji təhlükəsizliyi sahəsində əməkdaşlıq məsələlərinə yönəlib. O, Azərbaycan və Bolqarıstan arasında bir sıra mühüm birgə təşəbbüslərin uğurla həyata keçirildiyini vurğulayaraq, bu tərəfdaşlığın davam etdirilməsinə böyük önəm verildiyini qeyd edib.
Görüş zamanı strateji tərəfdaşlıq çərçivəsində müxtəlif mühüm məsələlər ətrafında geniş müzakirələr aparılıb.
Ceyhun Bayramov həmçinin post-münaqişə dövründəki regional vəziyyət, Azərbaycan-Ermənistan sülh prosesi və davam edən çağırışlar barədə bolqarıstanlı həmkarına məlumat verib.
