Şirvan Apellyasiya Məhkəməsinin dələduzluqda təqsirləndirilən Elvin Аtakişiyevin barəsindəki hökmdən yenidən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Zamin Tahirovun sədrliyi ilə keçirilən prosesdə qərar elan edilib.
Qərara əsasən, təqsirləndirilən şəxsin apellyasiya şikayəti təmin edilib, Zaqatala Rayon Məhkəməsinin hökmü cəzaya aid hissədə dəyişdirilib. Elvin Аtakişiyevin təqsirli bilindiyi Cinayət Məcəlləsinin 178.2.4-cü (dələduzluq) maddəsi ilə 2 il müddətə azadlığın məhdudlaşdırılması (elektron qolbaq) cəzasına məhkum olunub. O, məhkəmə iclas zalından azadlığa buraxılıb.
İttihama görə, Elvin Аtakişiyev əvvəllər tanıdığı zərərçəkmiş Murad Bəşirovla (ad, soyadı şərti) telefonla danışarkən onun oğlunun işsiz olması barədə məlumatı əldə edib. Sonra o, 2021-ci ilin sentyabr ayının əvvəllərində Murada zəng edib, onun oğlunu Fövqəladə Hallar Nazirliyinə yanğınsöndürən kimi işə düzəldə biləcəyini bildirib. Elvin həmin illərdə müxtəlif vaxtlarda Zaqatala rayonu ərazisində zərərçəkmişdən ümumilikdə 8900 manat pulu dələduzluq yolu ilə ələ keçirib.
Zaqatala Rayon Məhkəməsinin hökmü ilə Elvin Аtakişiyev 2 il müddətə azadlıqdan məhrum edilib və o, məhkəmə iclas zalından dərhal həbsə alınıb. Hökmdən narazı qalan məhkum apellyasiya şikayəti vermişdi.
Kamal Məmmədov
