Məsut Özilin siyasətə qoşulması və Türkiyə lideri Rəcəb Tayyib Ərdoğanın partiyasını təmsil etməsi Almaniyada geniş müzakirələrə səbəb olub. Xüsusilə də, o, Almaniya milli komandasının və bir neçə Bundesliqa klubunun keçmiş üzvü kimi tanındığı üçün bu addım diqqət çəkib.
90deqiqe.Az xəbər verir ki, "Verder Bremen" klubunun nümayəndəsi Almaniyanın "Bild" qəzetinə verdiyi açıqlamada bu barədə danışıb.
"Məsutu bu tədbirə dəvət etməmək qərarına gəldik, çünki onun son hərəkətləri "Verder"in dəyərlərinə ziddir"
Şənbə günü "Verder Bremen" klubunun, həmçinin "Yuventus" və "Atletiko Madrid"in keçmiş futbolçusu Dieqonun 40 yaşını qeyd etmək üçün təşkil edəcəyi tədbirə bir çox futbolçu dəvət olunub. Lakin keçmişdə "Verder Bremen"də çıxış etmiş Məsut Özil bu siyahıya daxil edilməyib. Klubun nümayəndəsi bildirib ki, bu qərar sırf klubun prinsiplərinə və dəyərlərinə əsaslanıb.
Qeyd edək ki, Məsut Özil karyerası ərzində "Verder Bremen"lə yanaşı, "Real Madrid" və "Arsenal" kimi nüfuzlu klublarda da çıxış edib. Onun siyasətə atılması isə futbol ictimaiyyətində müxtəlif reaksiyalar doğurmaqda davam edir.
