İstanbul Böyükşəhər Bələdiyyəsinin sədri Ekrem İmamoğlu saxlanılıb. Onun barəsində İstanbul Böyükşəhər Bələdiyyəsinə qarşı başladılan istintaq çərçivəsində saxlanılma qərarı çıxarılıb.
Bələdiyyə sədri “cinayət təşkilatı yaratmaq, rüşvət almaq, dələduzluq” kimi ağır cinayətlərdə ittiham olunur.
Modern.az həbs edilən bələdiyyə sədrinin bioqrafiyasını təqdim edir:
1970-ci ildə Trabzonun Akçaabat rayonunda anadan olan Ekrem İmamoğlu orta təhsilini Trabzon Liseyində tamamlayıb. Daha sonra ali təhsil üçün Şimali Kipr Türk Cümhuriyyətinə yollanıb və Şərqi Aralıq Dənizi Universitetinin İnşaat mühəndisliyi fakültəsinə daxil olub. Lakin qısa müddət sonra təhsil istiqamətini dəyişərək Girnə Amerika Universitetinin İctimaiyyətlə əlaqələr fakültəsində Biznes ixtisasına keçid edib. İki il burada oxuduqdan sonra İstanbul Universitetinin İngilis dilində Biznes ixtisasına qəbul olub və 1994-cü ildə məzun olub. Ali təhsilini daha da dərinləşdirərək İstanbul Universitetində İnsan resursları və idarəetmə sahəsində magistr dərəcəsi alıb.
İş həyatına 1992-ci ildə ailəsinə məxsus inşaat və podratçılıq şirkətində başlayıb və bu şirkətdə idarə heyətinin sədri vəzifəsini icra edib.
İdman sahəsində də aktiv fəaliyyət göstərən İmamoğlu Trabzonspor Futbol Klubu, Trabzonspor Basketbol Klubu və Beylikdüzüspor Klubunda rəhbər vəzifələrdə çalışıb.
Şəxsi həyatına gəldikdə, 1995-ci ildə Dilek Kaya İmamoğlu ilə ailə qurub. Cütlüyün 1997-ci ildə Mehmet Selim, 2005-ci ildə Semih və 2011-ci ildə Beren adlı övladları dünyaya gəlib.
Ekrem İmamoğlu aktiv siyasətə 2008-ci ildə qatılıb və Cümhuriyyət Xalq Partiyasına (CHP) üzv olub. 2009-cu ildə keçirilən bələdiyyə seçkilərində Beylikdüzü Bələdiyyə Başçılığı üçün namizədliyini irəli sürüb. Həmin il CHP Beylikdüzü rayon təşkilatının sədri seçilib.
2014-cü ilin 30 mart tarixində keçirilən bələdiyyə seçkilərində CHP-nin Beylikdüzü Bələdiyyə Başçısı namizədi olub və 50,83% səs toplayaraq vəzifəyə seçilib.
2019-cu ildə İstanbul Böyükşəhər Bələdiyyəsi Başçılığına namizəd olan İmamoğlu, 31 mart seçkilərində qalib gəlib. Lakin hakim partiyanın etirazları səbəbilə səslərin yenidən hesablanması prosesi baş tutub və 17 aprel 2019-cu ildə vəzifəsinin rəsmi təsdiqini alıb. Bununla belə, 6 may 2019-cu ildə Ali Seçki Komissiyasının (YSK) qərarı ilə seçkilər ləğv edilib və 23 iyun 2019-cu ildə yenidən keçirilib. Bu dəfə İmamoğlu 54,21% səs toplayaraq İstanbul Böyükşəhər Bələdiyyə Başçısı seçilib və 27 iyun tarixində rəsmi olaraq vəzifəsinə başlayıb.
5 il sonra, 31 mart 2024-cü ildə keçirilən bələdiyyə seçkilərində İmamoğlu yenidən qalib gələrək 51,14% səs toplayıb və ikinci dəfə İstanbul Böyükşəhər Bələdiyyə Başçısı olub.
