“Ukrayna sərmayələrin artırılması da daxil olmaqla, ABŞ-nin təklif etdiyi faydalı qazıntılar üzrə yeni saziş layihəsinə dəyişiklik tələb edəcək”.
Yeniavaz.com xəbər verir ki, bu barədə “Bloomberg” mənbəyə istinadən məlumat yayıb.
“Kiyev ehtiyat edir ki, saziş Avropaya inteqrasiyanı çətinləşdirə bilər, çünki hazırkı şərtlərə əsasən, Vaşinqton bütün əsas infrastruktur layihələrində monopoliya və birgə investisiya fondundan gəlir əldə edəcək, həmçinin Ukraynanın strateji resurslarına çıxış əldə edəcək ki, bu da Aİ-nin əməkdaşlıqdan kənarda qalmasına gətirib çıxara bilər”, - mənbə deyib.
Bildirilib ki, Ukrayna həmçinin, sazişin ABŞ-nin müharibə başlayandan bəri göstərdiyi bütün hərbi və iqtisadi dəstəyin ödənilməsini tələb edə biləcəyindən narahatdır.
Nəşrin məlumatına görə, Ukrayna rəsmiləri martın 28-də amerikalı həmkarları, o cümlədən hüquq ekspertləri ilə saziş layihəsinə aydınlıq gətirmək üçün video zəng edib.
Amerika rəsmiləri Kiyevin narahatlığına, xüsusən də sazişin Ukraynanın Aİ-yə üzvlük hədəfləri ilə potensial ziddiyyətinə dərhal etiraz etməyiblər. Mənbə hesab edir ki, bu, Vaşinqtonun dəyişiklikləri müzakirə etməyə açıq ola biləcəyini göstərir.
Xatırladaq ki, tərəflər arasında 2025-ci ilin əvvəlindən müzakirə edilən mineral sövdələşmənin fevralın sonunda imzalanması nəzərdə tutulurdu – bunun ölkə Prezidenti Volodimir Zelenskinin Vaşinqtona səfəri zamanı baş verəcəyi gözlənilirdi. Lakin jurnalistlərin qarşısında ABŞ Prezidenti Donald Tramp və ABŞ-nin vitse-prezidenti J.D.Venslə ictimai mübahisədən sonra Zelenski Ağ Evi erkən tərk edib.
Martın 19-da Tramp və Zelenski Ağ Evdəki mübahisədən sonra ilk dəfə telefonla şəxsən danışıblar. Martın 24-də Tramp Ukrayna ilə razılaşmaya dair razılığa gəldiyini və bunun tezliklə imzalanacağını bildirib.
