Düz 40 il əvvəl - 1985-ci il martın 11-də Mixail Qorbaçov SSRİ-nin rəhbəri oldu və “yenidənqurma”ya yol açmaq üçün addımlar atmağa başladı. 40 il keçsə də, tarixçilər hələ də Qorbaçovu başqa bir lider əvəz etsəydi, Sovet İttifaqı və müasir Rusiyanın hansı yolu gedəcəyini müzakirə edirlər. Ancaq ictimaiyyətin də bu məsələ ilə bağlı öz fikirləri var.
Hafta.az-ın KP.RU-nun keçirdiyi sorğunun nəticələrinə əsaslanaraq yazdığına görə, rusiyalıların 65 faizi “Qorbaçov hakimiyyətə gəlməsəydi, bu gün həyat daha yaxşı olardı” hesab edir. Sorğu iştirakçıları bildirirlər ki, alternativ lider ölkəni daha güclü və çiçəklənən nöqtəyə apara bilər.
İştirakçıların 25 faizi həmin dövrdə ölkənin müəyyən yolda olduğunu və hakimiyyətə hansı liderin gəlməsindən asılı olmayaraq SSRİ-nin dağılmasının qaçılmaz olduğunu bildirib. Bu fikri bölüşənlər düşünür ki, Qorbaçovun yerinə başqa lider gəlsə belə, nəticə əsasən eyni olacaqdı.
Respondentlərdən biri “SSRİ-nin sonu qaçılmaz idi, əsl sual bunun nə vaxt və nə qədər qan tökülməsi ilə baş verəcəyi idi” deyərək, tarixi prosesin liderlərdən asılı olmayaraq irəlilədiyini bildirib.
Sorğuda iştirak edənlərin yalnız 5 faizi Qorbaçovun rəhbərliyinin müsbət olduğunu və o olmasaydı, Rusiyanın daha pis vəziyyətə düşəcəyini deyib.
Qalan 5 faiz isə fərqli liderin dövründə nələrin baş verəcəyini proqnozlaşdırmağın mümkün olmadığını düşünüb.
Sorğuda VKontakte və Odnoklassniki sosial şəbəkələrindəki abunəçilər, həmçinin Telegram və Viber istifadəçiləri olmaqla ümumilikdə 4700 nəfər iştirak edib.
