Alman avtomobil nəhəngi "Volkswagen" müdafiə sənayesi istiqamətində mühüm addım atmağa hazırlaşır.
News24.az xəbər verir ki, şirkət Almaniya hökuməti ilə yeni müqavilə çərçivəsində hərbi texnika istehsalına başlayacaq.
"Volkswagen"in bu addımı Avropanın təhlükəsizlik siyasətindəki dəyişikliyə və Almaniyanın müdafiə xərclərini artırmasına paralel olaraq görülür. Müqaviləyə əsasən, şirkətin hərbi maşınlar və logistika dəstək sistemləri istehsal edəcəyi gözlənilir.
Əvvəllər avtomobil sektorunda fəaliyyət göstərən "Volkswagen", "Traton Group" və MAN kimi törəmə şirkətləri vasitəsilə dolayı yolla müdafiə sektorunda iştirak edirdi. Yeni strategiya ilə şirkətin hərbi sahədə daha aktiv rol alması planlaşdırılır.
Almaniyanın müdafiə sənayesini gücləndirmək məqsədlərinə uyğun atılan bu addım "Volkswagen"in istehsal gücünü genişləndirərək sektorda yeni səhifə açmasına şərait yarada bilər. Şirkətin bu yeni təşəbbüsü ilə bağlı rəsmi təfərrüatların yaxın günlərdə açıqlanması gözlənilir.
"Bu addım şirkətimizin geniş istehsal potensialını şaxələndirmək və cəmiyyətə xidmət etmək üçün mühüm fürsətdir. Bizim müdafiə sektoruna verdiyimiz töhfə təkcə işçi qüvvəsi və texnologiya baxımından deyil, həm də Almaniyanın təhlükəsizliyi baxımından mühüm rol oynayacaq", - "Volkswagen"in baş direktoru deyib.
Bu yeni təşəbbüs avtomobil nəhənginin milli təhlükəsizlik sahəsində məsuliyyətini artıracaq və eyni zamanda şirkətin davamlı inkişaf hədəflərinə əhəmiyyətli təkan verəcək.
Bildirilir ki, bu yeni razılaşma ilə Almaniya hökuməti müdafiə sənayesini dəstəkləmək üçün strateji addımlar atır və yerli istehsalı təşviq etməyi hədəfləyir. "Volkswagen"in hərbi istehsal fəaliyyətləri istiqamətində atdığı yeni addımın təkcə Almaniyada deyil, Avropada da böyük təsir göstərəcəyi gözlənilir.
Almaniyada avtomobil ixracının Covid-19 pandemiyasından əvvəl pik nöqtəsindən iki dəfə azaldığını nəzərə alsaq, hərbi ekspertlərin təhlillərinə görə avtomobil zavodları tutumdan istifadə edə bilər. Avropa Avtomobil İstehsalçıları Assosiasiyasının məlumatına görə, 2019-cu ildən bəri Avropa İttifaqında satılan yeni avtomobillərin sayı 15,1 milyondan 10,6 milyona düşüb.
Almaniyanın illik avtomobil ixracı da iki dəfə azalaraq 1,2 milyona düşüb. Çin hazırda dünyanın ən böyük avtomobil ixracatçısıdır.
Artan tələbata cavab olaraq, "Rheinmetall" və "KNDS Group" kimi bir çox böyük istehsalçılar avtomobil hissələri fabriklərini hərbi texnika istehsalı müəssisələrinə çevirməyə başlayıb.
Məryəm İlhamqızı
