Rusiya ordusu Ukraynanın şərq sərhədi boyunca qüvvələr toplayır ki, bu da Rusiya Federasiyasının Sumı vilayətinə zərbə endirmək istəyindən xəbər verir. Rusiyanın Kursk vilayətində Ukrayna qoşunları mühasirədə deyil.
Missiya.Az APA-ya istinadən xəbər verir ki, bunu Ukrayna Silahlı Qüvvələrinin Ali Baş Komandanı Aleksandr Sırskinin məruzəsindən sonra Ukrayna prezidenti Volodimir Zelenski deyib.
O bildirib ki, Ukrayna Ordusu Kursk vilayətində əməliyyatı davam etdirir:
"Bölmələr tapşırıqları dəqiqliklə yerinə yetirir. Kursk vilayətindəki Ukrayna qüvvələri sayəsində xeyli sayda Rusiya qüvvələri başqa ərazilərə yönləndirilib. Qoşunlarımız Kursk vilayətində Rusiya və Şimali Koreyanın müvafiq qruplarını saxlamaqda davam edir. Qoşunlarımız mühasirəyə alınmayıb".
Zelenski həmçinin deyib ki, Rusiya qüvvələrinin artması onu göstərir ki, Moskva bundan sonra da diplomatiyaya məhəl qoymayacaq:
"Rusiyanın müharibəni uzatması göz qabağındadır. Biz tərəfdaşlarımıza cəbhədə, Kursk bölgəsində vəziyyətlə bağlı bütün real məlumatları verməyə hazırıq".
